मुंबई ः कोरोना विरुद्धच्या लढाईमध्ये आपल्या जीवाची पर्वा न करता रात्रंदिवस वैद्यकीय अधिकारी, पोलिस कर्मचारी तसेच सफाई कामगार काम करत आहेत. डॉक्टर्स, नर्सेस सतत कोरोना रुग्णांच्या संपर्कात असतात. तर पोलिस कर्मचारी जनतेच्या सुरक्षिततेसाठी तासन् तास काम करत आहेत. आपल्या या लढवय्यांना कोरोनाची लागण होऊ नये म्हणून पुरेपूर काळजी घेतली जात आहे. मात्र जनतेची सेवा करत असताना यातीलच काही कर्मचाऱ्यांना कोरोनाची लागण झाली. यातील काहींनी कोरोनावर मात मिळवली. मात्र आज कोरोनामुळे पोलिस हेड कॉन्स्टेबलचा मृत्यु झाला आणि संपूर्ण महाराष्ट्र हळहळला. या हेड कॉन्स्टेबलच्या मृत्युनंतर सोशल मीडियाद्वारे कलाकारांनी शोक व्यक्त करत श्रद्धांजली वाहिली. 

हे ही वाचा ; विद्युत जामवाल अॅक्शनला कंटाळला आणि घेतला हा निर्णय...

वाकोला पोलिस ठाण्याचे हेड कॉन्स्टेबल चंद्रकांत गणपत पेंदूरकर यांचा कोरोना विषाणूमुळे आज मृत्यु झाला. ते 57 वर्षांचे होते. अशी माहिती मुंबई पोलिस या अधिकृत ट्विटर अकाऊंटवरुन देण्यात आली. त्यानंतर अभिनेते अमिताभ बच्चन यांनी ट्विट करत या हेड कॉन्स्टेबलला श्रद्धांजली वाहिली. `ही खरंच दुखःद बातमी आहे. आपल्या जीवाची पर्वा न करता ते आपल्या सुरक्षिततेसाठी रात्रंदिवस काम करत आहेत. त्यांच्या धैर्याला सलाम.` असे ट्विट अमिताभ यांनी केले आहे.

तसेच `आज मुंबईकरांनी खरा हिरो गमावला` असे ट्विट करत अभिनेत्री सोनाली कुलकर्णीने या हेड कॉन्स्टेबलला श्रद्धांजली वाहिली आहे.

अभिनेता रितेश देशमुखनेही चंद्रकांत पेंदुरकर तुम्ही खरे हिरो आहात. तुमच्यासाठी माझ्याकडे शब्दच नाहीत असे म्हणत त्याने दुःख व्यक्त केलं. 

या साऱ्या कलाकारांबरोबरच अनुभव सिन्हा, शंकर महादेवन, मधुर भंडारकर, सई ताम्हणकर, सिद्धार्थ जाधव यांसारख्या अनेक मंडळींनी सोशल मीडियाद्वारे शोक व्यक्त केला.

चंद्रकांत पेंदूरकर या हेड कॉन्स्टेबलच्या मृत्युची बातमी खरंच मन हेलावणारी आहे. आज असे अनेक कर्मचारी आपल्या कुटुंबापासून दूर राहत देशाची सेवा करत आहेत. त्यांच करावं तेवढं कौतुक कमी आहे.